20210226 印-尼行_印度簽證血淚史

27 Mar 2023 update info:

第一點：
最新喺網上見到嘅資料，BLS喺2023年3月1日已經搬咗去北角，各位要小心注意，千祈唔好去錯地方！

https://www.cgihk.gov.in/alert_detail/?alertid=60

第二點：
都係咁啱喺網上見到嘅，佢哋已經開放左e-Visa申請，詳情請睇”印度簽證血淚史…續篇”

20221119 印-尼行_02 印度簽證血淚史…續篇

因為這篇文章的內容，主要是圍繞香港人的簽證實況，所以只適用於香港人，因此我直接用香港人母語寫，這樣會令香港人更有親切感😃

呢次去印度真係搞到一鑊泡，喺我黎睇我朋友絕對係稱得上印度嘅旅行專家，佢已經去過好多次，我估佢喺印度旅行嘅時間，加加埋埋都有一兩年，但都從來未試過搞到咁大鑊！

佢其中一次嘅簽證仲係，喺尼泊爾寄個Passport返嚟(廿幾年前)，我幫佢去印度領事館搞簽證，果陣真係相當容易，但轉左網上辦手續(由所謂嘅私人公司代辦)就極其混亂，絕對係…🤬

以前去歐洲、俄羅斯辦簽證，雖然係手續繁複，要求嘅文件又多，但係所有嘢都好清晰，只要你集齊所有資料、文件，就可以”即時”辦理，無幾日就出到簽證。最PK係搞烏茲別克簽證嗰兩次，最後兩次最終都要去咗第二度旅行。

今次搞簽證要準備嘅資料，除咗個人資料之外，阿爺、阿嫲、老竇*、阿媽*、配偶相關嘅資料都要提供，真係查你祖宗十八代😩你以為呢啲已經好誇張，年輕人你太天真了😅
註*：唔好諗住求其老作，除非你打算去完呢次，以後唔再去印度😩如果唔係下次去簽證，就分分鐘會出事。

要搞簽證首先梗係入佢哋個網站睇睇，見到嘅介紹係唔夠詳細(所以外國人、台灣人都有寫攻略)，睇完晒所有資料就要開始準備填表。

必須要提醒大家，填表嘅時候係有Time out*, 大概有1分鐘左右，有時快有時慢，總之唔夠你填完之後，核對成版嘅資料(有D版面好長)，如果對對下佢跳咗出去，你之前填咗未save嘅資料，就全部化為烏有🤬
註*：我估呢個同佢哋伺服器承載量有關，希望快D可以改善！另外如果願意畀錢，喺佢哋辦事處填表，係冇時間限制，不過總共得兩部電腦，果個職員同時間serve兩個人，一部係佢直接幫手填，另一部電腦係你自己填，有嘢唔明你可以即刻問佢，佢有時間就會答你😃雖然係咁都有好多人排隊等。

咁又唔使咁驚因為填寫期間，佢有得畀你揀Save and continue 或者 Save and temporarily exit, 你以為咁咪得囉，咁你又太天真啦😂

如果果一版你仲未填晒資料，你揀Save and continue* 佢係唔會睬你，即係當你乜都冇做過，係咪好有性格呢😅咁揀 Save and temporarily exit咁咪掂囉👍
註*：呢個制仲有第二個用途，睇落去你就知😃

係就係，不過出咗去，要再入翻去，咁你就要輸入填完第一版之後，佢畀你果個水蛇春咁長嘅Temporary Application ID(強烈建議當見到呢個ID你之後copy*咗佢，咁就唔使逐隻字打返入去)。註*：每次退出嘅Temp ID都唔同，所以你要開個位儲起佢。

入返個網頁*之後，首先你要入番”Complete Partially Filled Regular/Paper Visa Form” 跟住你先可以抄番果個Temp ID 落去，仲要入埋圖形嗰啲象形文字(所謂嘅防電腦機械人，真係有病，唔係搞簽證嘅話，邊度有人咁得閒咁搞😩)。
註*：https://indianvisaonline.gov.in/visa/index.html
然後再由第一版開始，每一版你要拉到最底下，撳Save and continue個掣，先可以去到下一版， 一版一版咁樣入返去，去到你之前退出果一版，先可以繼續再填。

唔好以為你打得機多，手快就可以搞得掂，因為你打錯一隻字，對嘅時候又睇唔到，去到嗰邊申請嘅時候就會前功盡廢。

當你搞掂晒之後，去到BLS佢哋嘅職員，會攞住支筆，同你畀佢嘅資料，加埋你print畀佢嘅printout, 一項一項對，對一項剔一項，如果真係打錯一隻字，梗係要返屋企成份功課，由頭再做一次喇，小學都係咁㗎啦😩

係呀，真係要由頭做起，因為當你confirm之後，果個File就完結，以後都冇得再改㗎喇，所以撳confirm之前，一定要好小心好小心，對清對楚每一項*先submit入去，真係一失手成千古恨😭！
註*：建議最好梗係撳confirm之前，Save Exit然後再入返去，逐版Prince screen, 跟住攞住支筆，逐項逐項對，對一項剔一項啦，冇問題先再confirm呀。
辦理簽證所需時間，網上流傳的各有不同，由最短三日至近兩個月。有一個旅遊經驗豐富的女仔，搞咗差唔多兩個月，機票買咗，假又請咗，最後搞咗幾次，終於搞到喊，然後要退機票、改假期、重新計劃；亦都有人搞到把幾火，話以後唔會再去印度！

9月6號我哋親自去BLS問，佢哋回覆話簽證辦理時間，係一個禮拜，三日係有可能，我問佢一個禮拜係唔係真係出到，佢嘅回覆係”in general”, 唔好諗住問多幾句，因為佢哋冇專用嘅Enquiry counter, 當然更加冇reception喇。

如有任何查詢，必須自己攞張籌(D籌派完就冇㗎喇)，然後去辦理簽證嘅櫃檯詢問，但係佢回覆極之簡短，你再問多兩句，佢根本就唔會理你，你上去睇吓個墟冚情況，就隨時會嚇死你！

雖然佢回覆你嘅查詢唔會黑口黑面，但係佢嘅態度已經表示得好清楚，因為問咗三句，佢已經撳咗掣叫Next no. 嘅客人過嚟，佢嘅表情只可以講，係”相當專業”嘅木口木面…職業病😓

其實我哋申請簽證嘅時間，係有特別計算，當然人算不如天算！第一次去申請簽證係9月9號，如果好神奇咁，三日就出到簽證，咁樣簽證有限期，就由9月11號，或者12號開始計算。

我哋打算喺9月24號，離開香港去尼泊爾，先係加德滿都停留大概一個禮拜，然後開始行山，行程大概四至五個禮拜，加埋總共大概五、六個禮拜，然後去印度。

但係如果行山喺山上嘅行程有乜阻滯，可能會遲一、兩個禮拜先落到印度，即係話如果尼泊爾行程順利嘅話，會喺10 月底至11月初進入印度，如果有乜阻滯就要去到11月上旬或者11月中先可以入境。

所以前後時間都非常緊迫，遲啲去申請或者早啲去申請，都可能會出問題，當然可以申請長時間D嘅簽證，不過就未必會批。因為網頁上講明(親自去BLS問過都係咁講)，一般只發出三個月嘅Visa😃
https://www.blsindia-hongkong.com/touristvisa.php

點解唔早D辦理簽證？因為印度嘅三個月個人旅遊簽證，係由發出日起計算。如果太早申請，正如前面所講喺尼泊爾有乜阻滯，喺印度可能就要未玩完就走。

9月9號去申請果次終於衰咗，因為我用嘅係BNO, 佢其中一項係問，個護照喺邊度簽發，英文係寫”Place of issue”, 我梗係好醒咁填咗UK喇。

點知職員對到呢一項，嗰位姐姐打咗個大”X”, 之後佢俾返我，我問佢呢度出咗乜嘢問題，佢話唔係寫UK, 我問London?佢話都唔係，應該係”HMPO”(我大概聽到係咁)，跟住我話我聽得唔清楚，唔該你可唔可以寫畀我？

跟住佢用鉛筆係側邊，真係寫咗”HMPO”, 我問呢個係乜嘢嚟㗎？簽證嘅地方唔係係英國咩，跟住佢冇答我然後攞咗我個Passport指住畀我睇”Authority HMPO*”
註*：後來我問咗幾個英文人，其中一個係未讀完小學，已經去咗英國讀書，到大學都係英國讀書，問如果”Place of issue” 我應該填乜嘢？佢哋都知我個BNO, 幾年喺香港寄去英國續領，佢哋都話應該係填英國。

然後我同佢哋講應該係填” HMPO”大家都冇嘢講，據我嘅理解呢個應該係department, 而唔係地方囉🤬🤬🤬但我好清楚遊戲規則，係節目主持人手上的答案，永遠是對的，諗到呢樣調戲即刻順返晒😩🤬

跟住我好有禮貌咁問佢，可唔可以喺呢度改咗，然後我再簽個名*，佢話唔可以，我再問可唔可以喺旁邊部電腦，入翻去再改，佢話唔可以要返屋企重新填過，所以記住！記住！記住！千其唔好行差踏錯呀😩
註*：其實，我知都應該唔得，呢份hardcopy應該只係畀佢哋用嚟對，實際係Server上面嗰份先至係真！

另外我朋友嗰度都有嘢衰咗，10號我同個朋友都唔得閒，11號我哋重新再去申請，有上次慘痛嘅經驗之後😭，我哋真係逐隻字冇對，對得清清楚楚，先夠膽submit 入去😰

呢次終於搞掂咗，下晝已經收到印度駐港領事館發出嚟嘅email 通知(好快😂) “Reference to your visa application, the passport is ready for collection from the agency. We shall keep you updated with the progress.”

我相信佢想表示嘅係Received 而唔係Accepted! 另外佢所講”keep you updated”, 首先佢所講嘅”keep you”, 喺我嚟睇係流嘅，申請完咗之後，一切就好似石沉大海。

因為我哋自知時間緊迫，所以喺我哋嗰份行程，開頭第一句就寫得好清楚，9月24號離開香港(當然機票佢都會睇到)，希望佢哋大發慈悲，可以早少少畀個簽證我哋。

到9月16號，我第一次打電話去問BLS嘅職員，同佢講咗我哋嘅情況，佢好有禮貌咁同我講，佢會試吓了解吓，當然又係乜嘢聲氣都冇喇。

到咗19號、20號兩日，都有再打電話去問過，職員嘅回覆都係一樣，其實早兩日我哋已經打咗輸數，基本上已經放棄咗24號出發。

當時諗過萬一真係，9月24號朝早收到通知，出到個簽證，可以自己走去金鐘印度駐港總領事館，攞返個簽證同Passport*, 有一兩個鐘頭時間，即刻趕去機場都有機會趕得徹。註*：要事先去灣仔BLS搵個經理，通知佢並填張表，再攞住份通知信，然後再同印度領事館嗰邊夾時間！

但係最後都係覺得機會渺茫，再加埋另一個意外嘅原因，最後當然我哋都係，要搞到退機票(其實係放棄張機票，因為係冇錢退)、改行程，先去印度然後再去尼泊爾，咁樣就變咗喺熱嘅時候去熱嘅地方，喺凍嘅時候去凍嘅地方！

最後，真係一如所料，9月24號上晝大概11點，先收到email通知，話個簽證已經出到，可以去灣仔嗰邊攞😡🤬🤬🤬

下面係關於申請印度Visa嘅一D參考資料，特別再次強調，如果想去印度自助旅遊，唔好自己上網辦簽證，最好嘅方法係畀HK$250 BLS(記憶中係呢個價)。

當然如果你第一站去印度，又唔介意自己慢慢玩(申請Visa)嘅話，咁你就睇睇下邊啲資料先開始搞喇Goodluck!

必須要講清楚，喺我個人嚟講，今次申請Visa, 雖然相當慘痛，但係印度絕對係值得去嘅地方👍❤️

Visa Government Sample Form
https://tinyurl.com/hhvesk73

印度簽證慘痛經歷
https://mandykmli.wordpress.com/2017/10/03/india-visa/amp/

痛苦和時間換來的 印度簽證
https://tinyurl.com/y96rr267

最近印度簽證是怎樣?
https://www.backpackers.com.tw/forum/showthread.php?t=10196662

印度簽證攻略 如何辦理印度電子簽證？(必須注意BNO不可以辦理電子簽證)
https://tinyurl.com/25buf53p

新華旅遊印度簽證須知(列出的辦理簽證所需時間，跟我直接去查詢的有很大分別(最終證實這個才是正確)
https://tinyurl.com/5dkhr2ce

佢哋自己講”Visa Processing Time”最短係三日
https://indianvisaonline.gov.in/visa/visa-processing.html

BLS HK
http://www.blsindia-hongkong.com/howtoapply.php

BLS Indian Visa, Passport and Consular Services, Hong Kong
Add.: 10/F, Caltex House, 258 Hennessy Rd, Wan Chai
Tel.: 5819 5329
https://goo.gl/maps/HTA4pKRo5WZrD7SJA

如果你決定真係要自己攞嚟衰😅咁你就：

Requirement of photograph for passport
https://tinyurl.com/2b7vernr

BLS India Visa Undertaking form
https://tinyurl.com/2k37yran

India Visa PP Form
https://tinyurl.com/aeu86xte

India visa Form
https://tinyurl.com/m7bcmff3

Itinerary in India: 要寫定清楚嘅係印度整個行程，不過呢個佢哋都只係用來做參考，你要搵到第一站嘅hostel資料，包括電話同地址。

CHANGE TEXT CASE App
https://smallseotools.com/uppercase-to-lowercase the/

Applications fill-in online
https://indianvisaonline.gov.in/visa/index.html

簡單咁講吓，申請印度Visa應該要做嘅步驟：
1）睇晒上面啲資料
2）搞清楚自己用嘅係乜嘢Passport
3）將所有表格打印出嚟
4）搵晒相關嘅資料然後用手填一次
5）填好之後用手機，或者電腦開一個file, 將資料全部打晒出嚟，一項一項咁樣分開，每一項必須對得清清楚楚
6）入去開始填表”實際係copy and paste”入去
7）填好左第一版初步嘅資料之後，佢會畀個temp ID你，最好先copy喺頭先講嗰個否嘅頂部
8）填資料嘅時候唔使急最緊要快，填一項再一項，因為你所填嘅係copy落去，所以你對嘅只係對有冇抄錯咗落第二格，呢個方法安全好多
9）對過果版完全冇錯之後盡快save
10）填晒咁多版之後揀”Save and temporarily exit”
11）然後入返去再續板print出嚟
12）攞住個hardcopy逐項對清楚
13）冇問題入去confirm(即係撳圖六嘅Upload photo), 如果唔肯定就Exit
14）咁就可以攞齊所有相關文件，去BLS正式申請Visa
註*：見圖二頂部橙色箭嘴指住個位置，以後每一版頂部都會有。

註：
萬一真係遞交左之後先發覺有錯，可以重新再填過，之前果份唔使理，不過一定要搞清楚，要攞啱嘅hardcopy去辦理申請手續，因為到時職員會掃個Barcode嚟對應Server上面嘅資料。
另外所有form你自己印定，以防有乜嘢錯漏，可以即刻重新填過一張，喺嗰度佢哋會收HK$5一張。